by Drugs siege: నిర్మల్, అక్టోబర్ 3 (మన బలగం): నిర్మల్ జిల్లా కేంద్రంలోని శాంతినగర్ ప్రాంతంలో గురువారం రూ.43 లక్షల విలువైన క్లోరల్ హైడ్రేట్, ఆల్ఫజోలం లభ్యమైంది. శాంతినగర్‌లో ఉన్న ఓ గోదాంలో రూ.43 లక్షల విలువ చేసే మత్తుపదార్థాలను ఎక్సైజ్ ఎన్‌ఫోర్స్‌మెంట్, ఎస్టీఎఫ్ పోలీసులు పట్టుకున్నారు. ఎక్సైజ్ ఎస్టీఎఫ్ సూపరింటెండెంట్ ప్రదీప్ రావు తెలిపిన వివరాలు ఇలా ఉన్నాయి. హైదరాబాద్ ప్రధాన కార్యాలయానికి వచ్చిన పక్కా సమాచారం మేరకు నిర్మల్‌లోని గంధం శ్రీనివాస్ గౌడ్ ఇంట్లో దాడులు నిర్వహించినట్లు తెలిపారు. ఆయన ఇంట్లో 26 సంచుల్లో ఉన్న 728 కిలోల క్లోరల్ హైడ్రేట్, 3.3 కిలోల ఆల్ఫజోలం స్వాధీనం చేసుకున్నారు. గంధం శ్రీనివాస్ గౌడ్‌కు సోలాపూర్ శీను ఎలియాస్ భాయ్ ఆల్ఫజోలం, రాజస్థాన్‌కు చెందిన రూప్ సింగ్ క్లోరోహైడ్రేట్‌ను కొంతకాలంగా సరఫరా చేస్తున్నారు. వీటిని కల్తీ కల్లు తయారీకి వినియోగిస్తారు. నిషేధిత మత్తు పదార్థాన్ని స్వాధీనం చేసుకొని నిందితుడిని అదుపులోకి తీసుకున్నారు.
